शेतकर्‍यांसाठी एक रुपयात जेवण...!
माजलगाव शहरापासून पाच किलोमीटर अंतरावर ही बाजार समिती आहे. त्यामुळे सकाळी आपला माल घेऊन आलेल्या शेतकर्‍याला आपल्या शेतीमालाची विक्री करण्यासाठी दुपार होतेच. त्यातच जवळ जेवणासाठी कोणतेही हॉटेल नाही म्हणून शेतकर्‍यासाठी एक रुपयात जेवल मिळू लागल्याने स्वस्तात एक वेळच्या जेवणाचा प्रश्‍न सुटला. हे जेवण करण्यासाठी मात्र शेतकर्‍याला मालाची पोचपावती दाखवणं बंधनकारक आहे. गेल्या सहा वर्षांपासून माजलगाव कृषी उत्पन्न बाजार समितीमध्य शेतकर्‍यांसाठी एक रुपयात जेवण दिल जातं आहे. बाजार समितीने एका हॉटेल चालकाला एकोणतीस रुपयाप्रमाणे प्रती शेतकर्‍याचं जेवण ठरवून दिले आहे. यात शेतकर्‍याने फक्त एक रुपया द्यायचा, बाकी राहिलेले पैसे बाजार समिती भरते. रोज दीडशे ते दोनशे शेतकरी या ठिकाणी जेवण करत आहेत.
या वर्षी सरकारने तूर खरेदी केंद्र सुरु केले खरे, पण 15-15 दिवस तुरीचे मापच न झाल्याने अनेक शेतकर्‍यांना बाजार समितीची आवारातच मुक्कामी राहावे लागले. अशा परस्थितीमध्ये हमीभावाबरोबरच प्रत्येक बाजार समितीने आपल्या शेतकर्‍यासाठी एक रुपयात जेवण हा उपक्रम सुरु केला, तर निश्‍चितपणे त्याचा फायदा शेतकर्‍यांना होईल. एरव्ही केवळ बाजारभाव पडल्याने अनेक बाजार समिती ओस पडलेल्या असतात. मात्र, माजलगाव बाजार समिती मात्र याला अपवाद आहे.
