किशोरीताईंच्या निधनानं शास्त्रीय संगीतातील विशुद्ध सूर हरपला: पवार
‘किशोरीताईंच्या आई ख्यातनाम गायिका मोगूबाई कुर्डीकर यांच्याकडून जयपूर घराण्याचा वारसा जरी त्यांना लाभला तरी घराण्यात अडकून न राहता किशोरीताईंनी हिंदुस्थानी शास्त्रीय गायकी समृद्ध करण्यासाठी अनेक प्रयोग केले. अखंड अभ्यास, त्याला प्रगल्भ विचारांची जोड आणि परिश्रमपूर्वक केलेला संगीताचा कठोर रियाज यामुळे किशोरी आमोणकर या गायिकेचे गारुड रसिकांवर झाले ते कायमचेच.’
‘शास्त्रीय संगीतातील रसनिर्मिती आणि भावनाप्रधानता याला किशोरीताईंनी महत्त्व दिले. त्याकरिता सतत मनन, चिंतन करून प्रयोग केले. उपशास्त्रीय गायकीला सन्मान मिळवून दिला. केवळ गायकीपुरतंच मर्यादित न राहता ग्रंथनिर्मिती केली. अनेक सकस शिष्य घडवले. अलौकिक जादूभर्‍या आवाजाच्या साधक असलेल्या किशोरीताईंना मी व माझ्या कुटुंबियांच्या वतीने मनःपूर्वक श्रद्धांजली. त्यांच्या कुटुंबियांच्या दुःखात आम्ही सहवेदना व्यक्त करतो.’ असं म्हणत शरद पवारांनी किशोरीताईंना श्रद्धांजली वाहिली.
