मुलांना सक्षम बनविण्यासाठी पालकांनी प्रोत्साहन द्यावे : सुराणा
राष्ट्रसंत आचार्य आनंदऋषीजी महाराज यांच्या रजत पुण्यस्मृतीनिमित्त आनंदधाम येथे जैन सोशल फेडरेशन आयोजित व शांतीकुमारजी फिरोदिया मेमोरियल फौंडेशन प्रायोजित भगवान महावीर व्याख्यानमालेतील दुसरे पुष्प गुंफताना ‘प्रभावी पालकत्त्व’ या विषयावर सुराणा बोलत होते. उपस्थितांशी संवाद साधत त्यांनी पालकांना पालकत्त्वाची नवी ओळख करून दिली. अनेक किस्से, अनुभव कथन करीत त्यांनी तब्बल दोन अडीच तास मार्गदर्शन करताना उपस्थितांना कधी हसवले तर कधी अंतर्मुख करायला लावले. प्रारंभी ज्येष्ठ शिक्षणतज्ज्ञ डॉ.शरद कोलते यांच्या हस्ते सुराणा यांचा सत्कार करण्यात आला. अनिल मेहेर यांनी प्रमुख वक्त्यांच्या परिचय करून दिला. सरोज कटारिया यांनी स्वागत केले.
व्याख्यानाची सुरुवात करतानाच सुराणा यांनी परस्पर संवादातून समस्येवर तोडगा निघू शकत असल्याचे स्पष्ट केले. यातूनच त्यांनी पालकांना त्यांचे प्रश्न मांडण्यास प्रोत्साहित केले. मुलांची जबाबदारी कधीपर्यंत घ्यावी?, मुले घरी ऐकत नाहीत, सतत टि.व्ही.,मोबाईल, संगणक, इंटरनेटमध्ये व्यस्त असतात, खाण्यापिण्याकडे मुलांचे लक्ष नसते, मुले अजिबातच ऐकत नाहीत, कायम दंगा करायला आवडते अशा प्रश्नांसोबतच आमीर खानच्या दंगल चित्रपटाप्रमाणे कडक पालक होवून मुलांवर एखाद्या गोष्टीची सक्ती करावी का?, मुले सैराट होतायत मग पालकांनीही त्यांच्याप्रमाणेच सैराट व्हावे का? असे अनेक प्रश्न पालकांनी मांडले.
