कामाचे तास कमी करुन मुंबई पोलिसांना नववर्ष भेट

मुंबई, दि. 01 - नवीन वर्षाच्या सुरुवातीला मुंबई पोलिसांना भेट देण्यात आली आहे. पोलिसांचे कामाचे तास कमी करुन ते आता आठ तास  करण्याचा निर्णय पोलीस आयुक्त दत्ता पडसलगीकर यांनी घेतला आहे. याव्यतिरीक्त पोलीस दलातही काही महत्वाचे बदल केले जाणार असल्याचेही त्यांनी यावेळी  सांगितले.
मुंबई पोलिसांच्या नियंत्रणातील काही कक्ष बंद करण्यात येणार आहेत. यामध्ये वाहनचोरी विरोधी कक्ष, सीआययू विभागाचे लॉजिस्टीक युनीट, मालमत्ता कक्ष,  गुन्हे शाखेचा खंडणी विरोधी कक्ष, सोनसाखळी चोरी विरोधी कक्ष या कक्षांचा समावेश आहे. मुंबई पोलिसांना अनेक वेळा जास्तीचे काम करावे लागते. तसेच  अनेकदा बंदोबस्तासाठी त्यांच्या सुट्ट्या रद्द केल्या जातात. या पार्श्‍वभूमीवर देवनार पोलीस ठाण्यातील एका शिपायाकडून पत्र देण्यात आले होते. या पत्राची दखल  घेत पडसलगीकर यांनी हा निर्णय घेतला आहे.