ग्रंथमहोत्सव न्यूयार्कवर झेंडा फडकवले : प्रा. व. बा. बोधे
ग्रंथमहोत्सवाच्या समारोप प्रसंगी अध्यक्षस्थानावरुन ते बोलत होते. यावेळी प्रमुख पाहुणे सिनेअभिनेते किरण माने होते. यावेळी व्यासपिठावर मसापच्या सुनिताराजे पवार, प्राचार्य डॉ. यशवंत पाटणे, शिरीष चिटणीस, प्रा. कुमूदिनी मंडपे, नंदा जाधव, सुनीता कदम उपस्थित होते.
प्रा. बोधे म्हणाले, वक्ता शोधावा लागत नाही. लग्नाअगोदर नवरा वक्ता असतो तर लग्नानंतर तो श्रोता बनतो, असे सांगत, चांगले साहित्य वाचत रहा. साहित्य तुम्हाला घडवेल. नोटा बंदीमुळे एका युवकाने सोशल साईटवर एक वाक्य टाकले. ते साहित्य आहे, गुणी माणसावर प्रेम करा, आपल्या आई-वडिलांवर प्रेम करा, माणसे वाचायला शिका. कुठलाही माणूस वाईट नसतो, असे सांगत त्यांनी मराठी भाषा बिघडू लागली आहे. वेगळीच भाषा आली आहे, अशी खंत त्यांनी व्यक्त केली.
किरण माने म्हणाले, व. बा. बोधेंच्या शेजारी बसायला मिळाले. मी नट असलो तरीही अनेक पुस्तक वाचली आहेत. ग्रंथ महोत्सवात मी श्रोता म्हणून येत होतो. खेडेगावात लहानाचा मोठा झालो. सातार्याची नाळ आहे. कलाकार व्हायचे म्हटल्यावर जो-तो मुंबईला जातो. अनेक निर्मात्यांकडे फोटो सेशन करुन जायचे असते. मला ते चुकीचे वाटले. मी सातार्यात पुन्हा आलो. सातार्याने मला मोठे केले. माझं करिअर हे पुस्तकामुळे झाले. ग्रामीण कथांना मातीचा वास आहे. शंकर पाटील, व. बा. बोधे यांच्यासारख्या ग्रामीण लेखकांनी मला वेड लावलं होतं. नाटक करत असताना मला भालचंद्र नेमाडे भेटले. कोसला वाचलं. पु. ल., व. पू. ही वाचून काढले. त्यांनी वेगळं जग माझ्यापुढे आलं. श्याम मनोहर यांच्या लिखाणाची वेगळीच शैली. त्यांनी चौकट मोडायला शिकवलं. ग्रंथ प्रदर्शन ही सरस्वतीची यात्रा आहे. तुकाराम गाथा वाचली. स्ट्रगल काय असते ते गाथेतील अभंगाने शिकवलं. काय व्हायचे ते पक्क करा. ध्येय निश्चित करा. माझ्या सोबतीला ग्रंथ असल्याने तुमचा हा सातारचा सुपूत्र यशाची एकेक शिखरं पादाक्रंत करुन सातार्याचे नाव उज्वल करेल.
