उत्पादन घटल्याने टोमॅटो कडाडला, भाव गेला 80 पार!
मुंबई कृषी उत्पन्न बाजार समितीमध्ये आवक कमी झाल्यामुळे टोमॅटोचे भाव वाढू लागले आहेत. मार्केटमध्ये 30 ते 35 ट्रक टेम्पोमधून सुमारे 1400 क्विंटलची आवक होत आहे. दोन महिन्यांपूर्वी हीच आवक तिप्पट होती. आवक कमी असल्याने घाऊक बाजारातील दर 40 ते 45 रुपये किलो झाला असून, किरकोळ बाजारातमध्ये टोमॅटो 80 रुपये प्रतिकिलो विकला जात आहे. पाण्याअभावी बागायतदारांना कोणतेच पीक घेता येईनासे झाले आहे. टोमॅटोला दर आठवड्याला एक वेळा पाणी द्यावे लागते. धरणांमध्ये तर पाणी नाही, तसेच वारंवार वीजकपातही होत असते. यामुळे बहुतांश शेतकर्यांनी टोमॅटोकडे पाठ फिरवली, तर अनेक शेतकर्यांना केलेली लागवड काढून टाकावी लागली, अशी व्यथा धनकडेवाडीचे (ता. वाई) शेतकरी सुरेश पवार यांनी मांडली.
