दिल्ली डेअरडेव्हिल्सचा तिसरा विजय
मुंबई संघाची भिस्त कर्णधार रोहित शर्मावर होती. आतापर्यंत मुंबई संघाने मिळवलेल्या दोन्ही विजयांमध्ये रोहितने अर्धशतकी खेळी केली आहे. रोहितने 48 चेंडूंना सामोरे जाताना 7 चौकार व 1 षटकाराच्या मदतीने शानदार 65 धावा फटकावल्या. मुंबई संघाला अखेर 10 धावांनी पराभव स्वीकारावा लागला.
मुंबई संघासाठी कर्णधार रोहितचे अखेरच्या षटकात धावबाद होणे दुर्दैवी ठरले. मुंबईला अखेरच्या षटकात विजयासाठी 21 धावांची गरज होती. रोहितने ख्रिस मॉरिसच्या दुसर्‍या चेंडूवर षटकार ठोकला, पण तिसर्‍या चेंडूवर दुसरी धाव घेण्याच्या प्रयत्नात त्याची सहकारी हार्दिक पंड्यासोबत टक्कर झाली आणि पवन नेगीच्या थेट थ्रोवर तो धावबाद झाला.
लेग स्पिनर अमित मिश्राने मुंबई इंडियन्सच्या फलंदाजांना रोखण्यात महत्त्वाची भूमिका बजावली. मिश्राने सुरुवातीला अंबाती रायुडूला (25) क्लिन बोल्ड केले तर जोस बटलरला (2) पायचित केले. दिल्लीचा कर्णधार झहीर खानने आपल्याच षटकात कृणाल पंड्याला (36) धावबाद केले. किरॉन पोलार्डला (19) झहीरने तंबूचा मार्ग दाखवला. मिश्राने दोन, तर मॉरिस व झहीर यांनी प्रत्येकी एक बळी घेतला. त्याआधी, संजू सॅमसन (60) व जेपी ड्युमिनी (नाबाद 49) यांच्या शानदार खेळीच्या जोरावर दिल्ली डेअरडेव्हिल्सने 4 बाद 164 धावांची मजल मारली. सॅम्सनने 48 चेंडूंना सामोरे जाताना 60 धावा फटकावल्या. त्यात चार चौकार व 2 षटकारांचा समावेश आहे. सॅमसनने ड्युमिनीसोबत चौथ्या विकेटसाठी 8.3 षटकांत 71 धावांची भागीदारी केली.
