सातार्यातील एलबीएस कॉलेज परिसरात राडा; 5 जणांना अटक
सातारा, 07 - येथील लाल बहादूर शास्त्री महाविद्यालयाजवळ झालेल्या राड्यासंदर्भात दहा जणांवर गुन्हा दाखल झाला असून त्यापैकी पाच जणांना सातारा शहर पोलिसांनी अटक केली आहे. मुलींशी असभ्य वर्तन केल्याने या टोळक्याविरुध्द विनयभंगाचे गुन्हे दाखल करण्यात आले आहेत.
नीलेश यशवंत सावंत (रा. जकातवाडी), किशोर सावंत (रा. विठ्ठलवाडी), सौरभ खरात, योगेश कांबळे (दोघे रा. मल्हार पेठ) आणि आकाश नेटके अशी अटक केलेल्या संशयितांची नावे आहेत. या संशयितांनी कॉलेजमध्ये घुसून युवकांना मारहाण केली. मारहाणीदरम्यान युवतींची छेडछाड करून त्यांचा विनयभंग केला. हा सगळा प्रकार अर्धा तास सुरु होता. या घटनेनंतर संबंधित विद्यार्थी युवती व महाविद्यालयातील प्राध्यापक सातारा शहर पोलीस ठाण्यात गेले. त्यांनी महाविद्यालयात घडलेला प्रकार पोलिसांच्या कानावर घातला. एलबीएस महाविद्यालयाचे विभाग प्रमुख प्रा. नीलाप्पा लक्ष्मण तरवाळ (वय 32) यांनी शहर पोलीस ठाण्यात फिर्याद दिली. त्यानंतर पोलिसांनी तात्काळ कारवाई करून पाच जणांना अटक केली.