सासरच्या लोकांच्या छळाला कंटाळून विवाहितेची आत्महत्या
नाशिक, 24 - सासरच्या लोकांच्या सततच्या छळाला कंटाळून विवाहितेने गळफास घेऊन आत्महत्या केल्याची घटना नाशिकमध्ये घडली. नवरा, सासू आणि नणंदेच्या जाचाला कंटाळून आत्महत्या करत असल्याचे तिने आपल्या हातावर लिहून ठेवले होते.
नाशिकच्या जेलरोड परिसरात राहणार्‍या विशाल महाजन याच्याशी रमेश महाजन यांनी पाच वर्षा पूर्वी आपल्या मुलींचा विवाह करुन दिला. लग्नातच 2 लाख रुपयाच्या हुंड्याची मागणी करण्यात आली होती. मात्र अवकाळी पाउस गारपिटीचा सामना करणारा हा गरीब शेतकरी एवढी रक्कम देवू शकला नसल्याने गेल्या पाच वर्षा पासून सातत्याने मुलीचा छळ सुरु होता, त्यातच मुलीच्या सुखासाठी महाजन कुटुंबियांनी गाडी विकून घरदार विकण्याचीही तयरी दाखविली होती मात्र सासरच्या लोकांची पैशांची हवे काही सुटत नव्हती.
पूनमला पहिल्या मुलीनंतर सात महिन्यापूर्वी दुसरी मुलगीच झाली आणि तिच्या त्रासात वाढ झाली. आणि अखेर शुक्रवारी दुपारी तिने आपली जीवनयात्रा संपविली. आत्महत्येपूर्वी आपल्या डाव्या हातावर सासरच्या जाचाला कंटाळून आत्महत्या करत असल्याचे तिने लिहून ठेवल. याप्रकरणी उपनगर पोलीस ठाण्यात गुन्हा दाखल करण्यात आला.
