गरीब, गरजू आणि उपेक्षितांना आरोग्य सेवा द्या : विखे

प्रवरानगर - पद्मश्री विठ्ठलराव विखे आणि पद्मभूषण डॉ. बाळासाहेब विखे यांच्या दुरदृष्टीतून हे विद्यापीठ व रुग्णालय उभे राहिले. देशाच्या सर्वच भागातून विद्यार्थी येथे येऊन गुणवत्तापूर्ण वैद्यकीय शिक्षण घेत आहेत. त्यातून विद्यापीठाची शान वाढते. डॉ. राजेंद्र विखे आणि त्यांचे सहकारी यासाठी परीश्रम घेत आहेत. मात्र येथून बाहेर पडणाऱ्या विद्यार्थ्यांनी गरीब, गरजू आणि उपेक्षितांना आरोग्य सेवा पुरवण्याचे काम करावे, असे आवाहन विरोधी पक्षनेते राधाकृष्ण विखे पाटील यांनी केले. 

लोणी येथील प्रवरा अभिमत विद्यापीठाचा १२ वा दीक्षांत समारंभात प्रमुख पाहुणे म्हणून ते बोलत होते. नांदेड येथील स्वामी रामानंद तीर्थ मराठवाडा विद्यापीठाचे कुलगुरू डॉ. पंडित भालचंद्र विद्यासागर यांच्या प्रमुख उपस्थितीत हा सोहळा पार पडला. विद्यापीठाचे कुलपती डॉ. विजय केळकर अध्यक्षस्थानी होते. माजी मंत्री अण्णासाहेब म्हस्के, उपकुलपती डॉ. राजेंद्र विखे, कुलगुरू डॉ. वाय. एम. जयराज, माजी कुलगुरू डॉ. एम. जे. ताकवले, मोनिका सावंत-इनामदार, सुवर्णा विखे, एम. एम. पुलाटे प्रवरा शिक्षण संस्थेचे महासंचालक डॉ. सर्जेराव निमसे, डी. एन. अग्रवाल, डॉ. एन. एस. म्हस्के, एम. एन. गुलाटी, डॉ. रविंद्र कवडे, युवराज नरवडे, डॉ. राहुल कुंकुलोळ आदी यावेळी उपस्थित होते. या दीक्षांत समारंभात सुमारे ४२६ विद्यार्थ्यांना पदवी प्रदान करण्यात आली.