महावितरणकडून राज्यात विक्रमी २३ हजार ७०० मेगावॅट वीजेचा पुरवठा
राज्यात महावितरणच्या कार्यक्षेत्रात आज 23 हजार 700 मेगावॅट एवढ्या वीजेची कमाल मागणी नोंदविण्यात आली. महावितरणने वीजेची ही संपूर्ण मागणी यशस्वीपणे पूर्ण केली. राज्यात वीज यंत्रणेचे सक्षमीकरण व आधुनिकीकरण मोठ्या प्रमाणात करण्यात येत आहे. तसेच या यंत्रणेच्या देखभाल व दुरुस्तीची कामेही नियमितपणे केली जातात. त्यामुळे एवढया मोठ्या प्रमाणातील वीजेच्या मागणीचा पुरवठा महावितरणला पूर्ण करता येणे शक्य झाले आहे. आज मुंबईची वीजेची मागणी 3 हजार 375 मेगावॅट एवढी नोंदविण्यात आली तर संपूर्ण राज्याची वीजेची कमाल मागणी 23 हजार 700 एवढी नोंदविण्यात आली. एवढ्या मोठ्या प्रमाणात वीजपुरवठा करताना वीज वितरण यंत्रणेत कोणताही बिघाड न होता वीज पुरवठा झाला.