राजस्थानात झालेल्या पावसात 12 जणांचा बळी

जयपूर - राजस्थानला बुधवारी वादळी वार्‍यासह पाऊस झाला. या पावसाने पूर्व राजस्थानला जबरदस्त झोडपून काढले. यात एकूण 12 जणांचा मृत्यू झाला आहे. यातील 7 जण धोलपूर तर 5 जण भरतपूरचे नागरिक आहेत. झालेल्या मुसळधार पावसाचा आगरा-ढोलपूर रेल्वे सेवेवरही परिणाम झाला. तसेच धोलपूर भागात पाणी साचल्याने येथील जनजीवन विस्कळीत झाले आहे. उत्तर भारतातील काही भागातही वादळी वार्‍यासह पाऊस झाला. एवढेच नाही, तर या भागात मान्सूनपूर्व परिस्थिती निर्माण झाली आहे. भारतीय हवामान खात्याने बुधवारी पूर्व राजस्थानमध्ये पाऊस वा वादळ वा धुळीचे वारे येण्याची शक्यता वर्तवली होती. तसेच हवामान खात्याच्या अंदाजानुसार शुक्रवारपर्यंत अशीच स्थिती राहण्याचा अंदाज आहे.