काँग्रेसने कृतीद्वारे विकास कामे केली - मल्लिकार्जुन पाटील

सोलापूर, दि. 03, मार्च - अक्कलकोट तालुक्यातील विकासाची कामे आमदार सिद्धाराम म्हेत्रे यांनी काँग्रेस पक्षाच्या माध्यमातून केली. न केलेल्या कामांचे श्रेय मिळवण्याचा खटाटोप यशस्वी न झाल्याने भाजपचे पक्षनेते आनंद तानवडे यांनी चुकीचे आरोप केले. आम्ही फक्त बोलून तोंडाची वाफ घालवत नसतो, अशा शब्दांत जिल्हा परिषद कृषी व पशुसंवर्धन सभापती मल्लिकार्जुन पाटील यांनी भाजप पक्षनेते तानवडे यांच्यावर टीका केली. गेल्या आठवड्यात तानवडे व अक्कलकोट भाजप अध्यक्ष सचिन कल्याणशेट्टी यांनी जिल्हा परिषदेत पत्रकार परिषद घेतली. अक्कलकोट तालुक्यातील विकासकामे भाजपच्या माध्यमातून झाली आहे. पण, आमदार म्हेत्रे त्यांचे श्रेय लाटून स्वत: कामे केल्याचे सांगत असल्याची टीका तानवडे व कल्याणशेट्टी यांनी केली होती. त्याबाबत काँग्रेसचे सभापती पाटील यांनी भाजपच्या नेत्यांनी केलेल्या आरोपांचे खंडण केले. आमदार म्हेत्रे यांनी वेगवेगळ्या योजनांचा निधी खेचून आणला. झेडपीच्या माध्यमातून मतदारसंघासाठी भरीव निधी मिळवला. सर्वसामान्यांचे प्रश्‍न सोडविण्याची सवय काँग्रेसला आहे. मतदारांचा मोठा प्रतिसाद काँग्रेसच्या पाठीशी आहे. त्यामुळे भाजपच्या कार्यकर्त्यांच्या पायाखालची वाळू सरकली आहे, असे सभापती पाटील म्हणाले.