इंद्रा नूयी यांची आयसीसीच्या संचालक पदी नियुक्ती

मुंबई : ‘पेप्सिको’च्या अध्यक्षा इंद्रा नूयी यांची आंतरराष्ट्रीय क्रिकेट कौन्सिलच्या(आयसीसी) पहिल्या महिला संचालक म्हणून नियुक्ती करण्यात आली. इंद्रा नूयी या जून महिन्यापासून आयसीसीच्या संचालकपदाचा स्वतंत्र कार्यभार स्वीकारतील. आयसीसीच्या संचालकपदाचा स्वतंत्र कार्यभार एका महिलेच्या हाती सोपवण्याचा निर्णय आयसीसी क ौन्सिलने गेल्या वर्षी जून महिन्यात घेतला होता. आयसीसीच्या शुक्रवारच्या बैठकीत त्या पदावर इंद्रा नूयी यांची नियुक्ती करण्याचा निर्णय घेण्यात आला. इंद्रा नूयी हे उद्योग विश्‍वातले एक मोठे नाव असून, जगातल्या सर्वात शक्तिशाली महिलांच्या यादीत फॉर्च्युन मॅगझिनने त्यांचा सातत्याने समावेश केला आहे. पेप्सिकोच्या अध्यक्षा आणि सीईओ या नात्याने त्यांच्यावर फूड अँड बेव्हरेज विभागाची जागतिक जबाबदारी आहे. सदर विभागात 22 ब्रँड्सचा समावेश असून, प्रत्येक ब्रँडच्या उद्योगात वर्षाला अंदाजे एक अब्ज डॉलर्सची उलाढाल होत असते.