मुर्तुझा ट्रंकवाला व गौरव काळेच्या खेळीमुळे महाराष्ट्राचा बडोद्यावर विजय

नाशिक, दि. 25, जानेवारी - बीसीसीआयच्या वतीने बडोदा येथे सुरू असलेल्या 23 वर्षाखालील क्रिकेट स्पर्धेत महाराष्ट्राचा कर्णधार मुर्तुझा ट्रंकवाला व डावखुरा फिरकी गोलंदाज गौरव काळे यांच्या खेळी मुळे बडोद्यावर 7 गडी राखत विजय मिळविला. बडोदा संघाने प्रथम फलंदाजी करत 50 षटकात 9 बाद 198 धावा केल्या. नाशिकच्या गौरव काळे याने उत्कृष्ट फिरकी गोलंदाजी करत 10 षटकात केवळ 36 धावा देत 3 गडी बाद केले. पी बी सिंग याने 2 गडी बाद केले.

उत्तरादाखल महाराष्ट्र संघाने कर्णधार मुर्तुझा ट्रंकवाला च्या तडाखेबंद 36 चेंडूत 48 धावा व विजय झोळच्या 86 चेंडूत 83 धावांच्या जोरावर 34.5 षटकात 3 बाद 202 धावा करत 7 गडी राखून विजय संपादन केला. या सामन्यात नाशिककर दोन्ही खेळाडूंनी उत्कृष्ट खेळ करत महाराष्ट्र संघाला विजय मिळवून दिल्याने नाशिकचे नाव राष्ट्रीय स्तरावर घेतले जात आहे. उद्या महाराष्ट्रचा सौराष्ट्र सोबत उद्या सामना होणार आहे.