राज्य महिला आयोगाच्या अध्यक्षांनी साजरी केली कैद्यांबरोबर दिवाळी
कळत नकळत हातून घडलेल्या गुन्ह्याची शिक्षा भोगताना कारागृहातील जगणं नशिबी आलेल्या, घरापासून नातेवाईकांपासून दूर असलेल्या महिलांना आणि त्यांच्या मुलांना दिवाळी सणाचा आनंद मिळावा यासाठी विजया रहाटकर यांच्या हस्ते फराळ वाटप करण्यात आले. महिलांना साड्या आणि त्यांच्या मुलांना नवे कपडे यानिमित्ताने देण्यात आले. महिलांप्रमाणेच पुरुष कैद्यांनाही भाऊबीजेच्या दिवशी फराळ तसेच 100 ब्लँकेटची भेट देण्यात आली.
कारागृहातील 80 महिला कैद्यांशी यावेळी विजया रहाटकर यांनी संवाद साधत त्यांच्या अडचणी, अपेक्षा समजून घेतल्या. तपासणीसाठी महिला डॉक्टर असाव्यात तसेच गंभीर गुन्हे नसलेल्या महिलांना जलद न्याय मिळावा यासाठी लवकरच प्रत्येक आठवड्याला कारागृहात महिला डॉक्टर, स्त्रीरोग तज्ञ, समुपदेशक आणि वकील भेट देणार असून यामुळे या महिलांच्या आरोग्याच्या तसेच कायदेविषयक अडचणी दूर होण्यास मदत होणार आहे.
दिवाळीच्या दिवशी फराळ, नवे कपडे या भेटींसोबतच आपुलकीने विचारपूस करण्यात आल्याने अनेक महिलांना विजयाताईंशी बोलताना भावना अनावर झाल्या. या भेटी बाबत बोलताना विजया रहाटकर म्हणाल्या कि, दुर्दैवाने कारागृहात जीवन व्यतीत करणार्या आई बहिणींना ही दिवाळीचा आनंद मिळावा म्हणून मी त्यांच्यासोबत सण साजरा केला. सॅनिटरी पॅड व्हेंडिंग मशीन आणि सोलर वॉटर हिटरमुळे कैद्यांचे इकडचं जगणं सुसह्य होण्यास मदत होणार आहे. लवकरच दर आठवड्याला इथे महिला डॉक्टर, वकील येतील त्यामुळे स्वास्थ्यपूर्ण आयुष्य आणि न्याय मिळण्याची प्रक्रिया जलद होण्यास मदत होईल.
