सण, उत्सवात ध्वनिक्षेपक वापराबाबत सूट

नांदेड दि. 24 :-  आगामी सण, उत्सवात  ध्वनी प्रदुषण (नियमन व नियंत्रण) नियमान्वये  ध्वनीक्षेपक व ध्वनिवर्धक इ. वापर श्रोतेगृहे, सभागृहे सामुहिक सभागृहे  आणि मेजवाणी कक्ष यासारख्या बंद जागा खेरीज इतर ठिकाणी जिल्ह्याच्या निकडीनुसार दहा दिवस ध्वनीची विहीत मर्यादा राखून सकाळी 6 ते रात्री 12 वाजेपर्यंत  करता येईल, असे आदेश जिल्हाधिकारी अरुण डोंगरे यांनी काढले आहेत.
ध्वनीक्षेपकाचा वापर उद्यापासुन सुरु होणारा गणपती उत्सव दोन दिवस (पहिला दिवस व अनंत चर्तुदशी), नवरात्री उत्सव दोन दिवस (अष्टमी व नवमी ), दिवाळी  लक्ष्मीपुजन एक दिवस, ईद ए मिलाद एक दिवस, ख्रिसमस एक दिवस, 31 डिसेंबर एक दिवस तसेच उर्वरित दोन दिवस हे ध्वनी प्राधिकरण तथा जिल्हा पोलिस  अधिक्षक नांदेड यांच्या शिफारसी नुसार जिल्हातील महत्वाच्या कार्यक्रमासाठी गरजेनुसार जिल्हाधिकारी यांच्या परवानगीने दिले जाईल.
या सण उत्सवासाठी ध्वनीवर्धक व ध्वनीक्षेपक वापरण्याबाबतची सुट जिल्हयातील शांतता क्षेत्रासाठी लागू नसून त्याची अंमलबजावणी करण्याची जाबाबदारी संबंधित  महानगरपालिका आयुक्त, स्थानिक स्वराज्य संस्था व ध्वनी प्रदुषण नियंत्रण प्राधिकरण यांची राहील, असेही आदेशात म्हटले आहे.