येत्या तीन दिवसात दुधाचे दर वाढवणार : दुग्धविकास मंत्री

उस्मानाबाद, दि. 12 - राज्य सरकारने शेतकर्‍यांना खुशखबर दिली आहे. दुधाचे दर वाढवण्यासाठी शेतकर्‍यांनी केलेल्या संपाला अखेर यश मिळालं आहे. येत्या 3 दिवसात दुधाचे दर वाढवणार असल्याची माहिती दुग्धविकास मंत्री महादेव जानकर यांनी दिली. दुधाच्या नव्या दरांनुसार सध्याचा 24 रुपये लिटरनं असणारा गाईच्या दुधाचा दर आता 27 रुपयांपर्यंत वाढणार आहे. तर 33 रुपये लिटरनं म्हशीच्या दुधाचा असणारा दर आता 37 रुपयांपर्यंत वाढणार आहे. येत्या तीन दिवसात दुधाचे नवे दर लागू होणार असून दूध संघांना हे नवे दर दूध उत्पादकांना देणं बंधनकारक असणार आहे.
राज्य सरकारला शेतकर्‍यांची काळजी आहे. 13 तारखेला दुधाचे नवे दर घोषित करुन, शेतकर्‍यांना दिलासा देऊ. शेतकर्‍यांच्या पाठीमागे सरकार उभं राहील., असे राज्याचे दुग्धविकास मंत्री महादेव जानकर एबीपी माझाशी बोलताना म्हणाले. शेतकर्‍यांसाठी दुधाचे दर वाढवले असले, तरी सामान्य लोकांचाही सरकार विचार करत आहे. मध्यमवर्गीयांना त्रास होणार नाही, याची काळजी सरकार घेईल. मात्र, बळीराजाला आधार देण्याची आपण भूमिका घेतली पाहिजे., असेही जानकर यावेळी म्हणाले.