Breaking News

राजीव शुक्ला अध्यक्ष, लोढा समितींच्या शिफारसींसाठी बीसीसीआयची नवी समिती

नवी दिल्ली, दि. 27 - लोढा समितीच्या शिफारशी बीसीसीआयच्या प्रशासनात सहजतेनं कशा लागू करता येतील याचा अभ्यास करण्यासाठी बीसीसीआयनं एका समितीची स्थापना केली आहे. आयपीएल गव्हर्निंग कौन्सिलचे अध्यक्ष राजीव शुक्ला यांच्या अध्यक्षतेखालील या समितीत सात सदस्यांचा समावेश आहे. अन्य सहाजणांमध्ये बीसीसीआयचे प्रभारी सचिव अमिताभ चौधरी, खजिनदार अनिरुद्ध चौधरी यांच्यासह सौरव गांगुली, टी. सी. मॅथ्यू, नबा भट्टाचारजी, जय शाह यांचाही समावेश आहे.
सर्वोच्च न्यायालयाच्या लोढा समितीच्या कठोर शिफारशींपासून बीसीसीआयला आणि संलग्न असोसिएशन्सना वाचवण्यासाठी पदाधिकार्‍यांचा आटापिटा अजूनही सुरू आहे. त्यासाठी एक समिती स्थापन करण्याचा निर्णय बीसीसीआयच्या विशेष सर्वसाधारण सभेत सोमवारी घेण्यात आला होता. लोढा समितीच्या शिफारशींप्रकरणी सर्वोच्च न्यायालयात पुढील सुनावणी 14 जुलैला होणार आहे. त्यामुळं बीसीसीआयच्या नव्या समितीला आपला अहवाह किमान 10 जुलैपर्यंत तयार करावा लागणार आहे.