नाशिकमध्ये उत्स्फूर्त बंद, सलग पाचव्या दिवशी व्यवहार ठप्प
मुख्यमंत्री देवेंद्र फडणीस यांनी कृषीराज्यमंत्री सदाभाऊ खोत यांचा वापर करून शेतकर्‍यांत फूट पाडण्याचा कुटील डाव रचला. शेतकर्‍यावर गुन्हे दाखल करण्याचे काम सुरू केले आहे, असा आरोप शेतकर्‍यांनी केला. याचा निषेध म्हणून मुख्यमंत्री देवेंद्र फडणीस यांच्या प्रतिकात्मक पुतळ्याचे दहन करण्यात आले. तसेच रस्त्यावर टायर टाकत पेटवून दिले. मुख्यमंत्री देवेंद्र फडणीस यांनी राजीनामा द्यावा अशी मागणी यावेळी करण्यात आली. एसटी बसेस सुरू असल्याने काही अनुचित प्रकार घडल्यास त्यास शासन जबाबदार राहील असा इशाराही देण्यात आला.
शेतकर्‍यांनी मध्यरात्रीच महामार्गावर टायर जाळल्यानं सुरत- नागपूर महामार्गावरील लोणखेडी फाटा येथे वाहतूक विस्कळीत झाली. शेतकरी महामार्गावर एकत्रित आल्यानं वाहतूक विस्कळीत झाली. धुळे कृषी उत्पन्न बाजार समितीत आज सकाळी भाजीपाला विक्री सुरळीत सुरु झाला. नाशिक जिल्ह्यातून भाजीपाल्याची मोठी आवक झाल्याने धुळे कृषी उत्पन्न बाजार समिती आवारात भाजीपाला विक्री सुरळीत सुरू आहे. आजच्या महाराष्ट्र बंदला भाजप वगळता सर्वच पक्षांनी पाठिंबा दिला आहे. शिवसेनेच्यावतीनं आज धुळे बंदची हाक देण्यात आली आहे.
ज्याठिकाणी आंदोलन सुरू असेल त्याठिकाणा पासून काही अंतरावर बस थांबवावी, जेणेकरून एसटी बसचे नुकसान होणार नाही. परिस्थितीचं गांभीर्य पाहून तात्काळ पोलिसांना तसेच वरिष्ठांना माहिती द्यावी, अशा सूचना एसटी चालक-वाहकांना देण्यात आल्या आहेत. शेतकरी संपाच्या पाचव्या दिवशी चांदवड तालुक्यातील दुगाव येथे बंद पाळण्यात येऊन, शेतकरी रस्त्यावर उतरले. तसंच मनमाड-चांदवड रास्ता रोखून रस्त्यावर दूध आणि कांदा फेकला.
