35 हजार क्विंटल तूर मोजमापाच्या प्रतीक्षेत

बुलडाणा, दि. 27 - येथील नाफेड केंद्राअंतर्गत सुरु असलेल्या तुरीच्या मोजमापाला वेग आलेला आहे. एका महिन्यात 7 हजार क्विंटल तुरीचे मोजमाप झाले असून  टोकण देण्यात आलेल्या 35 हजार 436 क्विंटल तूर मोजमापाच्या प्रतिक्षेत आहे.
मागील काही दिवसात या केंद्रावर झालेल्या प्रकारामुळे प्रशासनाने या केंद्रांच्या प्रक्रियेत मोठे बदल घडवले असून शेतकर्‍यांना आधी टोकन वाटप व नंतर दूरध्वनीद्वारे  बोलावून त्यांच्या तुरीचे मोजमाप होत आहे. शिवाय आर्थिक झळही कमी झाली आहे. मात्र टोकन प्राप्त करून घेण्यासाठी बाजार समितीच्या कार्यालयात शेतकर्‍यांची  होणारी गर्दी पाहता बाजार समितीने शेतकर्‍यांसाठी पिण्याच्या पाण्याची व्यवस्था आणि उन्हापासून बचावासाठी मंडप उभारले आहे.