पोलार्डची धडाकेबाज खेळी, मुंबई इंडियन्सचा बंगळुरुवर सनसनाटी विजय
या सामन्यात मुंबईच्या गोलंदाजांनी बंगलोरला 20 षटकांत पाच बाद 142 असं रोखलं होतं. त्या लक्ष्याचा पाठलाग करताना मुंबईचा जोस बटलर स्वस्तात माघारी परतला. पुढच्याच षटकात लेग स्पिनर सॅम्युअल बद्रीनं पार्थिव पटेल, मॅकलेनहान आणि रोहित शर्मा यांना लागोपाठच्या चेंडूंवर माघारी धाडून हॅटट्रिक साजरी केली. मग नितीश राणाही परतला आणि मुंबईची आठ षटकांत पाच बाद 34 अशी बिकट अवस्था झाली.
त्या परिस्थितीत पोलार्ड आणि कृणाल पंड्यानं सहाव्या विकेटसाठी 93 धावांची भागीदारी रचून मुंबईला विजयपथावर नेलं. पोलार्डनं 47 चेंडूंत तीन चौकार आणि पाच षटकारांसह 70 धावांची निर्णायक खेळी केली. कृणाल पंड्यानं 30 चेंडूंत तीन चौकार आणि एका षटकारासह नाबाद 37 धावांची खेळी केली. त्यानं हार्दिक पंड्याच्या साथीनं मुंबईच्या विजयावर शिक्कामोर्तब केलं.
