फेसबुकची मैत्री पुण्यातील अभियंत्याला पडली महाग, 11 लाखाची ऑनलाईन फसवणूक
कपिल शेवते (37, रा. मांजरी, हवेली) यांनी हडपसर पोलिस ठाण्यात तक्रार दिली आहे. याप्रकरणी सॅँड्रा रॉबिन्सन व इतरांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, शेवते हे एका येरवडा परिसरातील एका नामांकित आयटी कंपनीत आयटी इंजिनीअर म्हणून नोकरी करतात. त्यांची फेसबुकवरून लंडन येथील सँड्रा नावाच्या तरुणीशी ओळख झाली. त्यांच्यात चॅटिंग सुरू झाले आणि ओळखीचे रूपांतर मैत्रीत झाले. शेवते यांनी तिला त्यांचा मोबाइल क्रमांक दिला. त्यानंतर सँड्राने शेवते यांच्याकडे भारतात स्थायिक व्हायचे असून, त्यासाठी मदत करण्याची विनंती केली. डिसेंबर 2016 मध्ये शेवते यांना एक फोन आला. त्या व्यक्तीने कस्टम विभागातून बोलत असल्याचे सांगितले. त्या व्यक्तीने शेवते यांना ‘त्यांची मैत्रीण सँड्रा दिल्लीत आली असून, तिचे यलो कार्ड हरवले आहे. तिच्याकडे दोन अॅपल मोबाईल, दोन लॅपटॉप, हिर्याचे दागिने, 47 हजार पौंड असा ऐवज मिळाला आहे. सॅँड्राला ताब्यात घेतले असून सुटका करायची असल्यास दंड भरावा लागेल,’ असे सांगितले. शेवते यांनी तिला बोलल्याशिवाय पैसे भरणार नसल्याचे सांगितले. त्यानंतर त्यांना सँड्राचा फोन आला. तिने कस्टमच्या अधिकार्यांनी पकडल्याचे सांगितले आणि मदत करण्याची विनंती केली.
शेवते यांनी होकार दिल्यानंतर कस्टमच्या अधिकार्यांनी दिलेल्या बँकेच्या खात्यावर काही रक्कम भरली. त्यानंतर दुसर्या क्रमांकवरून फोन आल्यानंतर दुसरे कारण सांगितले. तीन वेळा फोन करून त्यांच्याकडून अकरा लाख 43 हजार रुपये विविध खात्यावर मागवून घेतले. त्यानंतर शेवते यांनी सँड्राशी संपर्क साधण्याचा प्रयत्न केला. पण, संपर्क झाला नाही. त्यानंतर त्यांना फसवणूक झाल्याचे लक्षात आले. त्यानुसार गुन्हा दाखल करण्यात आला आहे. या प्रकरणी पोलिस निरीक्षक अंजूम बागवान हे अधिक तपास करत आहेत. सोशल मीडियावर ओळख झाल्यानंतर विविध कारणे सांगून फसवणूक केल्याच्या अनेक घटना पुण्यात घडत असल्याचे समोर आले आहे. त्यामुळे सोशल मीडियावरून ओळख झालेल्या व्यक्तींशी आर्थिक व्यवहार करताना काळजी घ्या. फेसबुकवर अनोळखी व्यक्तींशी मैत्री करू नका. व्यक्तीची प्रत्यक्षात भेट झाल्याशिवाय आर्थिक व्यवहार करू नका. ऑनलाइन ओळख झालेल्या व्यक्तींच्या भूलथापा व आमिषाला बळू पडू नका, असे आवाहन सायबर सेलच्या पोलिसांकडून करण्यात आले आहे.
