‘किसन वीर’ साखर कारखान्यावर राज्यस्तरीय कुस्त्या

भुईंज, दि. 26 (प्रतिनिधी) : किसन वीर सातारा सहकारी साखर कारखाना कार्यस्थळावरील आणि पंचक्रोशीतील ग्रामस्थांचे आराध्य दैवत श्री माणकाईदेवीची यात्रा 27 व 28 फेब्रुवारी रोजी आहे. यानिमित्त किसन वीर सातारा साखर कामगार कल्याण मंडळ व ऊस तोडणी वाहतूक व बैलगाडी कंत्राटदारांच्या सहकार्याने आणि कारखान्यातर्फे 28 फेब्रुवारी व 1 मार्च रोजी राज्यस्तरीय भव्य ‘किसन वीर चषक’ कुस्ती स्पर्धेचे आयोजन करण्यात आल्याची माहीती कारखान्याचे अध्यक्ष मदन भोसले यांनी प्रसिध्दी पत्रकाद्वारे दिली आहे. या कुस्ती आखाड्यासाठी काँग्रेसचे ज्येष्ठ नेते व महाराष्ट्र प्रदेश काँग्रेस कमिटीचे माजी प्रदेशाध्यक्ष प्रतापराव भोसले, पहिले हिंद केसरी श्रीपती खंचनाळे, अर्जुन पुरस्कार विजेते गणपतराव आंदळकर, हिंद केसरी दिनानाथ सिंह, दादू चौगुले, योगेश दोडके, विनोद चौगुले हे उपस्थित राहणार आहेत. 
28 फेब्रुवारी रोजी कारखाना कार्यक्षेत्रातील विविध वजन गटातील मानधनधारक आणि किसन वीर चषकसाठी कुस्त्यांना प्रारंभ  होणार आहे. प्रतिष्ठेच्या ‘किसन वीर चषक’ कुस्ती स्पर्धेसह प्रत्येक वजन गटातील पहिल्या तीन क्रमांकाच्या कुस्त्यांना 1 मार्च रोजी दुपारनंतर प्रारंभ होणार आहे. ‘किसन वीर चषक’ स्पर्धेतील विजेत्या प्रथम क्रमांकाच्या मल्लास चांदीची गदा व 75 हजार रूपये तर द्वितीय, तृतीय व चतुर्थ क्रमांकाच्या विजेत्या मल्लास अनुक्रमे 35 हजार, 25 हजार व 15 हजार रूपयांचे बक्षीस देण्यात येणार आहे. या कुस्ती आखाड्यास किसन वीर कारखान्याचे ज्येष्ठ माजी संचालक पै. नारायणराव पवार, ऑलिंपिक वीर बंडा पाटील-रेठरेकर, अर्जुन पुरस्कार विजेते काका पवार, महाराष्ट्र केसरी शिवाजीराव पाचपुते, बापूसाहेब लोखंडे, आप्पासाहेब कदम, विष्णू जोशीलकर, दादोजी कोंडदेव पुरस्कार विजेते दिनकरराव सूर्यवंशी, राष्ट्रकुल सुवर्णपदक विजेते रामचंद्र सारंग, आंतरराष्ट्रीय कुस्ती कोच उत्तमराव पाटील, महाराष्ट्र चॅम्पियन रावसाहेब मगर (सिनियर), जिल्हा तालीम संघाचे अध्यक्ष व शिवछत्रपती पुरस्कार विजेते साहेबराव पवार, सांगोला तालुका कुस्ती संघाचे अध्यक्ष श्रीकांत देशमुख, महाराष्ट्र केसरी गोरख सरक, नामदेव मोळे, संभाजी पाटील, छत्रपती पुरस्कार विजेते वसंत पाटील, शिवछत्रपती पुरस्कार विजेते शिवाजी म्हस्के, कॉमन वेल्थ गेम्स सुवर्ण पदक विजेते रघुनाथ पवार, उपमहाराष्ट्र केसरी साहेबराव जाधव, महाराष्ट्र केसरी माणिक पवार, एनआयएस कुस्ती कोच दिलीप पवार आदी नामवंत मल्ल उपस्थित राहणार आहेत. किसन वीर चषक कुस्ती स्पर्धा 70 ते 86 किलोच्या आतील व 65 ते 70 किलो दरम्यानच्या वजन गटात खेळवली जाणार आहे. कारखाना कार्यक्षेत्रातील मल्लांसाठी 76 किलो, 70 किलो, 65 किलो, 61 किलो, 57 किलो, 54 किलो, 50 किलो, 46 किलो, 42 किलो, 38 किलो, 35 किलो, 32 किलो  वजन गटातील प्रथम, द्वितीय व तृतीय क्रमांकासाठी लढती होणार आहेत. प्रत्येक गटातील प्रथम क्रमांकाच्या विजेत्यास कारखान्यातर्फे एक वर्ष मानधन देण्यात येणार आहे.