प्रधानमंत्री नरेंद्र मोदी यांच्या हस्ते शुक्रवारी १३ एप्रिल रोजी दिल्लीतील २६, अलीपूर रोड स्थित डॉ. बाबासाहेब आंबेडकर राष्ट्रीय स्मारकाचे उद्घाटन होणार आहे.भारतीय संविधानाचे निर्माते भारतरत्न डॉ. बाबासाहेब आंबडेकर यांचे दिल्ली स्थित २६, अलीपूर रोड येथील महापरिनिर्वाण स्थळाच्या ठिकाणी त्यांच्या जीवनकार्याचा व योगदानाचा परिचय करून देणारे स्मारक उभारण्यात आले आहे. २१ मार्च २०१६ रोजी या स्मारकाच्या बांधकामाची कोनशिला प्रधानमंत्री मोदी यांनी ठेवली होती.स्वतंत्र भारताचे पहिले कायदे मंत्री डॉ. बाबासाहेब आंबेडकर यांनी १ नोव्हेंबर १९५१ ला केंद्रीय मंत्रिमंडळातून राजीनामा दिला. त्यानंतर ते दिल्लीतील २६, अलीपूर रोड येथील सिरोहीच्या महाराजांच्या निवासस्थानी राहू लागले. पुढे ६ डिसेंबर १९५६ रोजी याच ठिकाणी त्यांचे महापरिनिर्वाण झाले. डॉ. आंबेडकरांच्या स्मृतीप्रित्यर्थ माजी प्रधानमंत्री अटलबिहारी वाजपेयी यांनी २ डिसेंबर २००३ ही वास्तू देशाला समर्पित केली.
