नाशकात गावठी कट्ट्यासह एकास अटक

मिळालेल्या गुप्त माहितीनुसार बेकायदा गावठी कट्टा बाळगणार्या युवकास शहर गुन्हे शाखेच्या युनिट 1 च्या पथकाने शनिवारी (दि. 31) दुपारी मखमलाबाद शिवारातील सुयोजित गार्डन भागातून जेरबंद केले. संशयिताच्या अंगझडतीत जिवंत काडतुसे आणि गावठी कट्टा असा सुमारे 30 हजार 500 रुपयांचा मुद्देमाल आढळून आला.

सोमनाथ कारभारी सानप (27) असे कट्टा बाळगणार्या संशयिताचे नाव आहे. संशयित शनिवारी दुपारी सुयोजित गार्डन भागातील मिरची हॉटेल परिसरात गावठी कट्टा घेऊन येणार असल्याची माहिती युनिट 1 चे पोलिस नाईक दिलीप मोंढे यांना मिळाली होती. त्यानुसार युनिटचे निरीक्षक आनंदा वाघ यांच्या मार्गदर्शनाखाली पथकाने परिसरात सापळा लावण्यात आला होता. संशयित मिरची हॉटेल भागात येताच पोलिसांनी त्यावर झडप मारून त्यास जेरबंद केले. संशयिताच्या अंगझडतीत गावठी कट्यासह जिवंत काडतुसे मिळून आले असून, याप्रकरणी म्हसरूळ पोलिसात गुन्हा दाखल करण्यात आला आहे.