भाईंदरमध्ये अल्पवयीन मुलीवर सामूहिक बलात्कार, पाच आरोपी अटकेत

भाईंदर, दि. 15 - भाईंदरमध्ये एका अल्पवयीन मुलीवर आठ जणांनी सामूहिक बलात्कार केल्याची खळबळजनक घटना उघडकीस आली आहे. मागील आठ महिन्यापासून मुलीवर बलात्कार होत असल्याचं उघड झालं आहे. यातील एक आरोपी अल्पवयीन असल्याची माहिती समजते आहे. नवघर पोलिसांनी पाच आरोपींना अटक केली असून तर तीन आरोपी अजूनही फरार आहेत.
एका सतरा वर्षीय अल्पवयीन मुलीवर त्याच परिसरात राहणार्‍या आठ मुलांनी अत्यंत अमानुषपणे बलात्कार केल्याची तक्रार नवघर पोलीस ठाण्यात करण्यात आली आहे. पीडित मुलगी अडीच महिन्याची गर्भवती राहिल्यानंतर ही बाब समोर आली. त्यानंतर पीडीत मुलीच्या पालकांनी पोलिसात गुरूवारी रात्री गुन्हा दाखल केला. याप्रकरणी, पोलिसांनी अमर सिंग, सुनील यादव, राजू पाटील, सुनील बोथ, राहुल यादव, पवन विश्‍वकर्मा, आणि एक अनोळखी इसम तसेच अल्पवयीन आरोपी यांच्याविरोधात गुन्हा दाखल केला असून पाच आरोपींना अटकही करण्यात आली आहे.