एटीएममधून पैसे काढण्यावरील मर्यादा फेब्रुवारी अखेर शिथील?
आरबीआयने लागू केलेली मर्यादा येत्या फेब्रुवारीच्या अखेरीस किंवा मार्च महिन्याच्या सुरुवातीला शिथील होण्याची चिन्हं आहेत. देशातील नोटांचा पुरवठा हळूहळू सुरळीत होत आहे, त्यामुळे ही शक्यता वाटत असल्याचं बँक ऑफ महाराष्ट्रचे कार्यकारी संचालक आर के गुप्ता यांनी पीटीआयला सांगितलं आहे. हा पूर्णपणे रिझर्व्ह बँकेचा निर्णय आहे. फेब्रुवारी अखेरीस 78 ते 88 टक्के चलन बाजारात येईल, त्यामुळे पुढील दोन महिन्यात परिस्थिती नियंत्रणात असेल, असा विश्वास वरिष्ठ अधिकारी व्यक्त करतात.
एटीएममधून पैसे काढण्याची मर्यादा सुरुवातीला दर दिवशी अडीच हजार रुपये इतकी होती. नोटाबंदीला 50 दिवसांचा कालावधी उलटल्यानंतर, म्हणजे 1 जानेवारीला ती 4500 रुपयांवर नेण्यात आली. त्यानंतर आठवड्याभराने ती दहा हजार रुपये इतकी करण्यात आली होती.
