वाई हत्याकांडातील ज्योती मांढरे माफीचा साक्षीदार होण्याची शक्यता
सरकार पक्षाच्यावतीने यापुर्वीच अ‍ॅड. उज्ज्वल निकम यांची या खटल्यात सरकारी वकील म्हणून नियुक्ती करण्यात आली आहे. 11 ऑगस्ट 2016 रोजी संतोष पोळ याने अंगणवाडी सेविका संघटनेच्या कार्यकर्त्या मंगल जेधे हिचा खून केल्याचे निष्पन्न झाले. तेव्हांपासून पोळला पोलिसांनी ताब्यात घेवून त्याची चौकशी केली असता पोळ याने आणखी 5 खुनाची कबुली दिली.
सुरेखा चिकणे (20 मे 2003), वनिता गायकवाड (12 ऑगस्ट 2006), जगाबाई पोळ (13 ऑगस्ट 2010), नथमल भंडारी (7 डिसेंबर 2015), सलमा शेख (17 जानेवारी 2016) यांचा खून करण्यात आला होता. यापैकी मंगल जेधे, सलमा शेख व नथमल भंडारी या तीन खून प्रकरणांचा खटला सातारा जिल्हा सत्र न्यायालयात वर्ग करण्यात आला आहे. तर अन्य तीन खुनांचे खटले लवकरात लवकर वर्ग करण्यात येणार आहेत. संतोष पोळ याची सहकारी ज्योती मांढरे हिच्यामुळेच खुनांची उकल करण्यात पोलिसांना यश आले होते. त्यामुळे पोलिसांनी सुरुवातीपासून ज्योती मांढरेवर लक्ष केंद्रीत केले असून तिला याप्रकरणात माफीचा साक्षीदार करण्याचे ठरले आहे.
ज्योती मांढरे ही सध्या सातारा कारागृहात असून तपासी अधिकार्‍यांनी ज्योती हिला माफीचा साक्षीदार करावे, म्हणून न्यायालयाकडे विनंती अर्ज केला आहे. या अर्जावर दि. 23 रोजी सुनावणी होणार आहे. संतोष पोळ याच्या जामीनासाठी त्याचदिवशी अर्ज करणार आहे.
