किवींविरुद्ध रांचीमध्ये चौथी वनडे, धोनीच्या कामगिरीकडे चाहत्यांच्या नजरा
टीम इंडियाने मोहालीची तिसरी वन डे जिंकून या मालिकेत 2-1 अशी आघाडी घेतली आहे. मोहालीच्या मैदानात भारताच्या विजयात धोनीनेही महत्त्वाची भूमिका बजावली होती. त्याने आधी अमित मिश्राच्या गोलंदाजीवर रॉस टेलर आणि ल्यूक रॉन्कीला यष्टीचीत केले. मग चौथ्या क्रमांकावर खेळताना धोनीने 91 चेंडूंमध्ये 80 धावांची खेळी करून विराटच्या साथीने चौथ्या विकेटसाठी 151 धावांची भागीदारी रचली होती. धोनीला दीर्घ कालावधीनंतर एक फलंदाज म्हणून गवसलेला फॉर्म टीम इंडियासाठी सुखावह ठरावा. साहजिकच आता रांचीला आपल्या घरच्या मैदानात धोनी काय कामगिरी बजावतो यावर सर्वांची नजर राहील. रांचीचा हा सामना जिंकून मालिकाही खिशात टाकण्याची संधी धोनीच्या टीम इंडियाकडे आहे.
