वॉर्नरचे शतक;ऑस्ट्रेलियाचा द. आफ्रिकेवर विजय
सेंट किट्समधील मैदानावर शनिवारी रात्री झालेल्या या सामन्यात ऑस्ट्रेलियाने प्रथम फलंदाजी करताना 288 धावा केल्या होत्या. या आव्हानापुढे दक्षिण आफ्रिकेची स्थिती एकवेळ 3 बाद 210 अशी होती. मात्र, त्यानंतर अवघ्या 42 धावांतच त्यांचे बाकीचे खेळाडू बाद झाल्याने आफ्रिकेचा डाव 252 धावांत संपुष्टात आला आणि त्यांना 36 धावांनी पराभवाला सामोरे जावे लागले.
संथ खेळपट्टीवर वॉर्नरने संयमी फलंदाजी करत 157 चेंडूत शतक झळकाविले. वॉर्नरने मायदेशाबाहेर एकदिवसीय सामन्यांत झळकाविलेले हे पहिलेच शतक होते. त्याला उस्मान ख्वाजा आणि कर्णधार स्टिव्ह स्मिथ यांनी अर्धशतके झळकावून चांगली साथ दिली. स्मिथने अखेरपर्यंत मैदानात थांबत केलेल्या अर्धशतकी खेळीमुळे ऑस्ट्रेलियाने 288 धावांपर्यंत मजल मारली. या आव्हानापुढे दक्षिण आफ्रिकेने चांगली सुरवात केली. क्विटॉन डी कॉक बाद झाल्यानंतर फाफ डू प्लेसिस आणि हाशिम आमला यांनी अर्धशतके ठोकत आफ्रिकेला विजयाकडे नेले. मात्र, हे दोघे बाद झाल्यानंतर ड्युमिनी आणि डिव्हिलर्स यांना डाव संभाळण्याचा प्रयत्न केला. डिव्हिलर्स 39 धावांवर बाद झाल्यानंतर आफ्रिकेचे उर्वरित फलंदाज अवघ्या 42 धावांत बाद झाले. त्यामुळे आफ्रिकेचा डाव 48 व्या षटकात 252 धावांत संपुष्टात आला. ऑस्ट्रेलियाच्या जोश हेझलवुड, मिशेल स्टार्क आणि ऍडम झम्पा यांनी प्रत्येकी तीन बळी मिळविले.
