मुख्य प्रशिक्षकपदाच्या शर्यतीत प्रवीण आमरे
दि. 1 जून रोजी मुख्य प्रशिक्षकपदाची जाहिरात बीसीसीआयने प्रसिद्ध केली. त्यानंतर सर्वप्रथम रवी शास्त्री व नंतर संदीप पाटील, रजपूत आदींनी आपले अर्ज दाखल केले. बुधवारी एकाच दिवशी वेंकटेश प्रसाद व संधू या रिंगणात दाखल झाले तर आता प्रवीण आमरेने देखील नशीब आजमावून पाहण्याचा निर्णय घेतला आहे. आमरे यांनी भारतीय संघातर्फे 11 कसोटी व 37 वनडे सामने खेळले आहेत.
प्रवीण आमरे यांना शैलीदार फलंदाजी व दरबान येथे पदार्पणातच शतक झळकावल्याबद्दल विशेष ओळखले जाते. 1992 मध्ये त्याने दक्षिण आफ्रिकेविरुद्ध अॅलन डोनाल्ड, ब्रेट स्कूल्त्झ यांच्या मा-याला सामोरे जात शानदार शतक झळकावले होते. प्रवीण आमरे यांनी मुंबई रणजी संघाला प्रशिक्षण दिले असून याचबरोबर आयपीएलमध्ये दिल्ली डेयरडेव्हिल्स संघासाठी देखील ते प्रशिक्षक राहिले आहेत. सध्या झिम्बाब्वे दौ-यावर संघासमवेत रवाना झालेला जयंत यादव देखील आमरे यांचाच शिष्य आहे.
