पंतप्रधानांच्या सभेत मंडप कोसळून 20 जखमी
मिदनापूर/वृत्तसंस्था
पश्‍चिम बंगाल येथील मिदनापूर जिल्ह्यात पंतप्रधान नरेंद्र मोदी यांची सभा सोमवारी सुरू असतांनाच सभामंडप कोसळण्याची घटना घडली. यामध्ये 20 जण जखमी झाले आहेत. सभा सुरू असताना तेथे बांधण्यात आलेल्या मंडपाचा काही भाग कोसळला. यात अनेक लोकं त्या मंडपाखाली सापडले. या अपघातामध्ये 20 लोक जखमी झाले आहेत. दरम्यान, जखमींना तात्काळ रुग्णालयात दाखल करण्यात आलं आहे. पंतप्रधान मोदी यांचे भाषण सुरू असताना अचानक मंडप खाली पडला. त्यावेळ मोदी थांबले आणि त्यांच्या सुरक्षेत असलेल्या एसपीजी कमांडोला काय प्रकार घडला आहे ते पाहण्याचे आदेश दिले. त्यावर त्यांना मंडप पडल्याचे समजले. या सगळ्या प्रकारानंतर मोदी स्वतः मंडप पडून जखमी झालेल्या लोकांची भेट घेण्यासाठी रुग्णालयात पोहचले. यावेळी मोदींनी जखमी लोकांची विचारपूस केली. दरम्यान, हा मंडप पडला कसा याचा तपास पोलीस करत आहेत.
