‘डीएड’च्या पहिल्या वर्षीच्या परीक्षेत तब्बल 12 हजार 744 विद्यार्थी अनुत्तीर्ण
महाराष्ट्र राज्य परीक्षा परिषदेमार्फत घेण्यात आलेल्या डीएलएडच्या प्रथम व द्वितीय वर्षाचा निकाल जाहीर करण्यात आला. पहिल्या वर्षाचा निकाल 24.59 टक्के, तर द्वितीय वर्षाचा 29.12 टक्के इतका लागला आहे. हा निकाल परिषदेच्या संकेतस्थळावर उपलब्ध आहे. डीएलएड परीक्षा 1 ते 10 जून या कालावधीत घेण्यात आली होती. या परीक्षेचा निकाल जाहीर झाला असून, निकालाचे मूळ गुणपत्रक अध्यापक विद्यालयामार्फत 20 सप्टेंबर रोजी मिळणार आहेत. गुडपडताळणी व उत्तरपत्रिकेची छायाप्रत मागणीसाठी अर्ज करण्याचा अंतिम मुदत 16 सप्टेंबरपर्यंत आहे.
डीएलएड प्रथम वर्षासाठी 17 हजार 21 विद्यार्थ्यांनी परीक्षा दिली होती. त्यापैकी 4 हजार 185 विद्यार्थी उत्तीर्ण झाले असून, उत्तीर्णाची टक्केवारी 24.59 आहे. तब्बल 12 हजार 744 विद्यार्थी अनुत्तीर्ण ठरले आहेत. एटीकेटीप्राप्त विद्यार्थ्यांची संख्या शून्य आहे. द्वितीय वर्षाच्या निकालात 7 हजार 329 विद्यार्थी उत्तीर्ण, तर 17 हजार 730 विद्यार्थी अनुत्तीर्ण व एटीकेटीप्राप्त विद्यार्थी आहेत, असे परिषदेकडून सांगण्यात आले आहे.
