मनमाड, दि. 25 - मनमाडमध्ये तब्बल 1 कोटी 98 लाख रुपयांच्या नव्या नोटा सापडल्या आहेत. मनमाड पोलिसांनी केलेल्या कारवाईत दोन जणांना ताब्यात घेऊन त्यांच्याकडून 1 कोटी 98 लाख रुपयांची रक्कम जप्त केली. मनमाड-मालेगांव चौफुलीवर नाकेबंदी करून शुक्रवारी रात्री पोलीस वाहनांची तपासणी करत होते. पोलीस निरीक्षक पुंडलिक सपकाळ, ए. एच. शेख यांना इनोव्हा (एमएच 12 डीवाय 5736) गाडीमध्ये 1 कोटी 98 लाख रुपयांच्या दोन हजार व पाचशेच्या नोटा आढळल्या. पोलिसांनी गाडीतून दोघांना ताब्यात घेतले. या नोटा कुठून आणल्या व कुठे नेण्यात येत होत्या याचा तपास सुरू आहे.
