हेल्मेट सक्तीमुळे बनावट हेल्मेटचा सुळसुळाट

औरंगाबाद, 07 - न्यायालयाच्या आदेशानुसार शहरात हेल्मेट सक्तीची अंमलबजावणी सुरू झाल्यानंतर बनावट हेल्मेटचा सुळसुळाट सुरू झाला असून या काळ्या उद्योगात अनेकजण हात धुऊन घेत आहेत. दुसरीकडे पोलिसांची दंडवसुलीची सक्ती अन् मनमानी सहन करून नागरिकांना अवाच्या सव्वा भावातील हेल्मेट खरेदी करावे लागत आहेत. 

 हेल्मेट सक्तीनंतर बनावट हेल्मेटच्या वाहत्या गंगेत हात धुवून घेणार्‍या तिघांना गुरुवारी सिटीचौक पोलिसांनी छापा टाकून अटक केली. त्यांच्याकडून अ‍ॅपेरिक्षात भरलेले तब्बल 49 बोगस हेल्मेट जप्त केल्याची माहिती सिटी चौक ठाण्याचे निरीक्षक नागनाथ कोडे यांनी दिली. एसटी कॉलनी, फाजलपुर्‍यात बोगस हेल्मेटचा साठा असल्याची माहिती कोडे यांना मिळाली, ते पथकासह एसटी कॉलनीत 

गेले. छापा टाकून रशीद खान ताहेरखान (वय-25), शेख इशान शेख याकुब, फय्याजखान अब्दु माजेद या अ‍ॅपेचालकाला अटक केली. अ‍ॅपेमधील हेल्मेटची तपासणी केली असता, ते बनावट असल्याचे उघड झाले.