वडगाव पुलावरून ट्रक कोसळला, ट्रकचालकास वाचवण्यात यश

 पुणे (प्रतिनिधी)। 20 - देहूरोड-कात्रज बाह्यवळण मार्गावरील वडगावकडून वारजेकडे जाणार्‍या पुलावरून चारचाकी ट्रक पुलाला धडकून सुमारे 30 ते 35 फुटावरून खाली कोसळला या अपघातात कोणतीही जीवितहानी झाली नाही.अपघाताची खबर मिळताच अग्निशमन दलाच्या दोन गाड्या घटनास्थळी दाखल झाल्या. 

तिथे पोहचताच जवानांना स्थानिक नागरिकांकडून ट्रकमधील एक व्यक्ती सुखरूप बाहेर आला असून आतमधे ट्रकचा चालक असून त्याचे पाय अडकले असल्याची माहिती मिळाली. त्यावेळी जवानांनी क्षणाचाही विलंब न करता तत्परतेने स्प्रेडर तसेच रेस्क्यू व्हॅनमधील इक्विपमेंटचा कौशल्याने वापर करून अवघ्या दहा मिनिटांतच त्या जखमी चालकाची सुखरूप सुटका केली व त्याला रुग्णवाहिकेतून उपचाराकरिता रवाना केले.

या बचावपथकामधे  सिंहगड अग्निशामक केंद्रातील अधिकारी प्रभाकर उम्राटकर यांच्या मार्गदर्शनाखाली तांडेल शिवाजी मुजूमले, विलास दुगाणे, वाहन चालक  रामचंद्र सातपुते, योगेश जगताप  तसेत जवान संतोष नलावडे, चंद्रकांत गावडे, विलास घडशी, गणपत पडये, प्रमोद मरळ, मनिष बोंबले, सोपान कांबळे, सचिन आवाळे, स्वप्निल वेताळ यांनी सहभाग घेत त्या वाहनचालकाचे प्राण वाचवले.