राज्यात आंतरराष्ट्रीय शैक्षणिक दर्जाच्या 100 शाळा निर्माण करणार
जागतिक पातळीवर PIRLS (Progress in International Reading Literacy Study) ही भाषा विषयाची चाचणी दर पाच वर्षांनी घेतली जाते. ही चाचणी फक्त चौथीच्या विद्यार्थ्यांसाठी असते. तसेच TIMSS (Trends in international mathematics and Science Study) ही गणित आणि विज्ञान या विषयासाठीची चाचणी दर चार वर्षांनी घेतली जाते. ती चौथी व आठवीत शिकणार्‍या विद्यार्थ्यांसाठी असते. तर वयोवर्ष 15 असणार्‍या मुलांसाठी दर तीन वर्षांनी PIS- (Programme for International Student -ssessment) ही गणित, विज्ञान आणि भाषा विषयांसाठी संयुक्तपणे घेतली जाते. या चाचण्यांमधील त्या त्या देशातील विद्यार्थ्यांनी केलेल्या कामगिरीच्या आधारे देशाचा गुणानुक्रम ठरवला जातो. या गुणानुक्रमानुसार संबंधित देशाचे आंतरराष्ट्रीय स्तरावरील गुणवत्तापूर्ण शिक्षण देणार्‍या संस्थांच्या यादीतील संस्थांबाबतचे मानांकन निश्‍चित केले जाते.
जागतिक पातळीवर घेतल्या जाणार्‍या चाचण्यांमधील राज्यातील शिक्षण संस्थांचा सहभाग वाढवणे महत्वाचे आहे. याच दृष्टीकोनातून जागतिक स्पर्धेत उतरण्यासाठी राज्यात आंतरराष्ट्रीय शैक्षणिक दर्जाच्या 100शाळा निर्माण करण्यात येत आहेत. यासाठी दर्जेदार शाळांच्या निर्मितीसाठी निकषांची निश्‍चिती करण्यात आली आहे. या निकषांच्या आधारे शाळांची निवड करण्यात येऊन त्यांचा दर्जा आंतरराष्ट्रीय स्पर्धेत टिकेल इथपर्यंत विकसित करण्यावर भर देण्यात येईल. आंतरराष्ट्रीय करण्यासाठी शाळांकडून आलेल्या अर्जातून शाळांच्या निवडीसाठी शिक्षण आयुक्तांच्या अध्यक्षतेखाली निवड समिती स्थापन करण्यात येणार असून या समितीमध्ये विद्या प्राधिकरण, प्राथमिक शिक्षण आणि माध्यमिक शिक्षण संचालक तसेच महाराष्ट्र राज्य माध्यमिक व उच्च माध्यमिक शिक्षण मंडळाचे अध्यक्ष यांचा सदस्य म्हणून समावेश असेल. प्राप्त अर्जातून माहितीची योग्य ती छाननी करुन अंतिमतः शाळांची निवड करण्यात येईल. प्रत्येक जिल्ह्यातून किमान एक शाळा निवडण्यात येईल. शाळांच्या निवडीसाठी माध्यमाची अट नाही मात्र मराठी व्यतिरिक्त इतर माध्यमांच्या शाळा असतील तर त्या शाळेतील शिक्षणात इंग्रजी भाषा व स्पोकन इंग्लिशचा दर्जा अतिउत्कृष्ट असणे अनिवार्य आहे. शाळा इंग्रजी माध्यमाची असेल तर तिथे मराठी भाषा शिक्षणाचा दर्जा अतिउत्कृष्ट असणे आवश्यक आहे.
