वीज पडून दोन महिलांचा मृत्यू

जालना, दि. 15, ऑक्टोबर - जालना जिल्ह्यातील घनसावंगी व बदनापूर तालुक्यात वीज पडून झालेल्या दोन घटनांमध्ये दोन महिलांचा मृत्यू झाला. याबाबत अधिक महिती अशी की, बदनापूर तालुक्यातील धामणगाव येथे उषा श्याम आढे (23) यांचा अंगावर वीज पडून मृत्यू झाला, तर त्यांच्या जाऊ सुनिता राम आढे (21) या गंभीर भाजल्या. पाऊस आल्यामुळे दोघीही दुपारनंतर शेतातून घरी येत असताना ही घटना घडली.
दुस-या घटनेत घनसावंगी तालुक्यातील पानेवाडी येथे शुक्रवारी दुपारी मुसळधार पाऊस झाला. 4 - 5 महिला शेतात कापूस वेचत असतांना पावसामुळे त्या शेतातील आखाड्यावर आश्रयास आल्या असता, शोभा लक्ष्मीकांत भागवत (22) या जवळच असलेला कापसू झाकण्यासाठी गेल्या. त्याच वेळी अंगावर वीज कोसळल्यामुळे त्यांचा मृत्यू झाला. शोभा भागवत यांचे दोन वर्षापूर्वीच लग्न झाले होते. म.चिंचोली, राजेगाव, घनसावंगी घोन्सी, डहाकेगाव परिसरात शुक्रवारी जोरदार पाऊस झाला. यामुळे परिसरातील नदी नाल्यांना पूर आला आहे.